அறிவியல் ஆராய்ச்சியில் இந்தியாவுக்கான இடம்

அறிவியல் ஆராய்ச்சியில் இந்தியாவுக்கான இடம்:

நோபல் பரிசு குறித்த அறிவுப்புகள் வெளியாகும்போதெல்லாம் இந்தியா குறித்த ஆதங்கம் நம் மனதில் ஏற்படும். அறிவியல் ஆய்வுகள் சார்ந்த நோபல் பரிசை ஒரு இந்தியர் பெற்று பல ஆண்டுகள் ஆகிறது. ஆராய்ச்சிகளுக்கு நாம் முக்கியத்துவம் தராததே இதற்குக் காரணம். உலக நாடுகளில் நடைபெறும் அறிவியல் ஆராய்ச்சிகளைக் குறித்து ‘நேச்சர்’ இன்டெக்ஸ் நிறுவனம் கடந்த 1.1.2015 முதல் 31.12.2015 வரை செய்த ஆய்வு முடிவுகளை 2016ம் ஆண்டு வெளியீடாக அண்மையில் வெளியிட்டுள்ளது. ஆய்வின் முடிவினைக் கல்வி நிறுவனங்கள், கார்ப்பரேட் நிறுவனங்கள் என 2 பிரிவுகளிலும், வேதியியல், புவி மற்றும் சுற்றுச்சூழல், வாழ்வு அறிவியல்கள், இயற்பியல் அறிவியல்கள் என 4 பாடப் பிரிவுகளிலும், இயற்கை மற்றும் அறிவியல் எனும் ஆய்விதழ் குழு உட்பட 5 தலைப்புகளின் கீழ் பிரித்து, ஒன்றிணைத்து அட்டவணைப்படுத்தி வெளியிட்டிருக்கிறது. 

உலக அளவில் அறிவியல் ஆராய்ச்சிகளில் சிறந்து விளங்கும் நிறுவனங்கள், நாடுகள், கல்வி நிறுவனங்கள், கார்ப்பரேட் நிறுவனங்கள், வேதியியல் நிறுவனங்கள், புவி மற்றும் சுற்றுச்சூழல் நிறுவனங்கள், வாழ்வு அறிவியல் நிறுவனங்கள், இயற்பிய அறிவியல் நிறுவனங்கள் என்ற தனிப்பிரிவுகளிலும் அட்டவணையை வெளியிட்டிருக்கிறது. உலகளவில் அறிவியல் ஆராய்ச்சிகளில், சிறந்த நிறுவனங்கள் பிரிவில் 500 நிறுவனங்கள் பட்டியலிடப்பட்டுள்ளன. இதில் இந்தியாவைச் சேர்ந்த இந்தியத் தொழில்நுட்பக் கழகம் 51, அறிவியல் மற்றும் தொழில் ஆய்வுக்குழு (Council of Scientific and Industrial Research (CSIR)) 80, இந்திய அறிவியல் நிறுவனம் (Indian Institute of Science (IISc)) 137, இந்திய அறிவியல் கல்வி மற்றும் ஆய்வு நிறுவனம் (Indian Institute of Science Education and Research (IISER)) 159, டாடா அடிப்படை ஆய்வு நிறுவனம் (Tata Institute of Fundamental Research -TIFR) 268, இந்திய வேளாண்மை அறிவியல் கழகம் (Indian Association for the Cultivation of Science -IACS) 295, ஜவஹர்லால் நேரு உயர்நிலை அறிவியல் ஆய்வு நிறுவனம் (Jawaharlal Nehru Centre for Advanced Scientific Research -JNCASR) 397, ஐதராபாத் பல்கலைக்கழகம் (University of Hyderabad -UoH) 472 எனப் பட்டியலில் இடம்பெற்றுள்ளன. 

உலக அளவில் அறிவியல் ஆராய்ச்சிகளில், சிறந்த நாடுகள் பட்டியலில் அமெரிக்கா, சீனா, ஜெர்மனி உள்ளிட்ட 50 நாடுகள் இடம்பிடித்துள்ளன. இந்தியா 13வது இடத்தில் உள்ளது. உலகளவில் அறிவியல் ஆராய்ச்சிகளில் சிறந்த கல்வி நிறுவனங்கள் பட்டியலில் மொத்தம் 500 கல்வி நிறுவனங்கள் இடம்பிடித்துள்ளன. இந்தியாவின் இந்திய அறிவியல் நிறுவனம் 118, இந்திய அறிவியல் கல்வி மற்றும் ஆய்வு நிறுவனம் 137, ஜவஹர்லால் நேரு உயர்நிலை அறிவியல் ஆய்வு நிறுவனம் 330, ஐதராபாத் பல்கலைக்கழகம் 390 எனப் பல்வேறு இடங்களைப் பிடித்துள்ளன. கார்ப்பரேட் நிறுவனங்களில் 100 நிறுவனங்கள் இடம்பெற்றிருக்கின்றன. எனினும் இந்திய நிறுவனம் ஒன்றுகூட இடம்பெறவில்லை. அறிவியல் ஆராய்ச்சிகளில் சிறந்த வேதியியல் நிறுவனங்களில் 100 நிறுவனங்கள் இடம்பெற்றிருக்கின்றன. இந்தியாவின் அறிவியல் மற்றும் தொழில் ஆய்வுக்குழு 27, இந்தியத் தொழில்நுட்பக் கழகங்கள் 30, இந்திய அறிவியல் கல்வி மற்றும் ஆய்வு நிறுவனம் 63 என இடங்களைப் பெற்றுள்ளன. 

சிறந்த இயற்பியல் நிறுவனங்களின் பட்டியலில் 100 நிறுவனங்கள் இடம்பெற்றுள்ளன. இந்தியாவின் இந்தியத் தொழில்நுட்பக் கழகங்கள் 46வது இடத்தில் உள்ளன. புவி மற்றும் சுற்றுச்சூழல் நிறுவனங்கள் மற்றும் சிறந்த வாழ்வு அறிவியல் நிறுவனங்கள் பட்டியலில் உலக அளவில் 100 நிறுவனங்கள் இடம் பெற்றுள்ளன. இதில் இந்திய நிறுவனங்கள் ஏதுமில்லை. இந்தப் பட்டியலைப் பன்னாட்டு அளவிலும் ஆப்ரிக்கா, ஆசியா, பசிபிக், ஐரோப்பா, வட அமெரிக்கா, தென்அமெரிக்கா, மேற்கு ஆசியா மண்டலப் பகுதிகள் வழியாகவும், நாடுகளின் பெயர்கள் வழியாகவும், தனிப்பிரிவுகள் வழியாகவும் தனித்தனியே அட்டவணைப்படுத்தி உள்ளனர். 2016ம் ஆண்டுக்கான முழுமையான பட்டியலையும், கடந்த 2013, 2014 மற்றும் 2015 ஆம் ஆண்டுகளில் வெளியிடப்பட்ட பட்டியலையும் முழுமையாகப் பார்க்க https://www.natureindex.com/ இணைய முகவரிக்குச் செல்லலாம். இதில் ஆய்வு மாணவர்களுக்கு உதவக்கூடிய பல்வேறு தலைப்புகளிலான ஆய்வுக்கட்டுரைகளும் உள்ளன.